“Олоҥхо күнэ Кэрэлигэ”

 

Саллар саас тухары олоҥхо

Саханы үрдэтиэ олоҥхо:

Кэс тылбыт кэскилин көрдөрүө,

Кэхтибэт кэрэтин сөхтөрүө.

 

Күннүк Уурастыырап.

 

         2005 сылаахха Саха республикатын президенин Вячеслав Анатольевич Штыров уурааҕынан сэтинньи ый 25 күнэ Олоҥхо күнүнэн биллэриллибитэ. ЮНЕСКО туох – ханнык иннинэ олоҥхону аан дойду култууратын шедеврын быһыытынан үйэтитэри, харыстыыры, киэҥ эйгэҕэ таһаарары ирдиир, уонна аан дойду култууратын шедевринэн билиммитэ.

Олоҥхо – саха норуотун тылынан уус – уран айымньытын саамай үрдүк чыпчаала, үйэттэн үйэлэр тухары көлүөнэттэн көлүөнэҕэ бэриллэн испит дириҥ ис хоһоонноох айымньыта буолар.

Сэтинньи 30 күнүгэр “Кэрэли” улуустааҕы оҕону эбии үөрэхтээһин киинигэр Олоҥхо дэкээдэтин чэрчитинэн Олоҥхо уонна Хомус күннэригэр анаммыт тэрээһин  буолан ааста. Саха сиэринэн алаадьы астаан, сыт таһааран, кэлбит ыалдьыттары, оҕолору киин үлэһиттэрэ алаадьынан, былык миининэн, тоҥ күөрчэҕинэн  күндүлээтилэр. Оҕону эбии үөрэхтээһин киинин “Айылгы” фольклор куруһуогун салайааччыта Анастасия Слепцова  сэтинньи уонна ахсынньы ыйдар сиэрин-туомун, аһылыгын кэпсээтэ, алгыс ырыатынан арыйда, куруһуокка дьарыктанар оҕолор олонхолоон, хомустаан ситэрэн-хоторон биэрдилэр. Улууска биллэриллибит “Олоҥхо алыптаах эйгэтэ” оҕолор улуустааҕы өйтөн суруйуу,  "Олоҥхо алыптаах эйгэтэ" уруһуй куонкурус түмүктэрэ таҕыста, олоҥхо араас кинигэлэрэ быыстапканан турдулар. "Олоҥхо ыллыктарынан айан" остуол оонньуута, " Олоҥхону төһө билэҕин?" викторина ыытылынна.

            Норуот күүһэ – өйүгэр, өйүн күүһэ – тылыгар диэн этэллэр. Тыл бары бастыҥа, сүмэтэ фольклорга, олоҥхоҕо баар диэн тылларынан бүгүҥҥү тэрээһини уопсай хомуһунан түмүктээтибит.